ثمة أيامٍ استعصت على النسيان، لِمَ لا وهي التي ظلت محفورة في الذاكرة لاتمحوها سنون العمر المتسارعة ولا أيام الغربة، ولانحسات الأيام..تلك الأيام المزرعة بموسم الحصاد في أيام الدرت ، أيام نعيشها مع اهلنا مع الحصاد ..
في قريتنا ام ضهير طيبةشياخةجديجارسيفو( مصر ) كما اطلق عليها جدنا محمود ود زايد عليه رحمة الله ومغفرته.. مع بشريات الحصاد ان شاء الله الوضع مشرف والحال مستورة نعم الخريف نسبته ٧٠% لكن نجتهد ونلم القليلة واهلنا قالوا العاف قليلتو ضاع ونجتهد في الحصاد ونتعاون اهلنا قالوا العين خوافه لكن الضراع اعمى وبعد الحصاد تظهر تباشير المناسبات السمحة الخطوبات والزيجات ويتغير جو القرية الى الأفراح والاستعداد للمناسبات عن طريق النفير والكل يعمل على مساعدة العريس ويظهر التعاون والتكاتف بين اهل القرية والقرى المجاورة طبعا الذرة يتم تخزينها للاكتفاء الذاتي بما يعرف ب(الكِيلة)وما زاد عنها يباع ونادرا ما تباع الذرة او العيش وقالوا قديما العيش نوم العين.. والشيخ فرح ود تكتوك استشار العيش افتراضي،فقال له: العيش يا البتودر الكرميش ابيعك ولا اخليك.. وجرد من نفسه شخصا تمثل في العيش ليجيب فكانت الإجابة : (لو بعت نوم عينيك انا مالي بيك) وصاح العيش بودر الكرميش كان جوعان تكون مضبلن.. واهلنا قالوا أيضا الجيعان ما ببرد الحارة واهلنا قالوا العصا من الكلب والسكين من السلب وفكة الريق مسمار القلب..
اما السمسم هو المحصول النقدي يباع وتوظف قيمته في الزيجات من سد مال وغيره.. (والدرت مبشر الغاني يجينا الدرت وكلنا بنساوى كعب الانقطاعة بعد العرق ما ناوى الجيب فاضي والدحشورة دايرة حلاوة الدرت زيت السمسم والسمسم الدكاك والويكة الجديدة ملاح ويكاب مع زيت سمسم عصيدة حارة تكرب تقيف كلب بوش وعليها كباية شاي الشاي الكيني ابو اسد لامن تعرق وتعنى قطع العيش طبعا من الخلاء بتجي شبعان من دي لالوبة ودي نبقه ودي تبشه ودي ام بنه وكذلك صمغ الهشاب وصمغ الطلح الخمير مع العونكوليب ابو شويشة يعني تختمها بالسكريات بعدين الزهور زهرة التبر والحنتوت)..
والغناي قال نوارة التبر زي دبورة البوليس شوف الدقة في التشبيه بعدين ريحة البرم الرائحة النفاذة عندما تخطلت مع ريحة ام بنه كدي ده فليل دمور المسخ العطور سودانا حلو وتراثنا حلو تراث الوسط في الجزيرة نزرع قطنا نزرع نتيرب نحقق أملنا يا الشيخ اخوي يلا الزراعة ده قطن بلادنا أجمل بضاعة والشمال يا ام در يا ربوع سودانا نحيك وانت كل آمالنا في غربك عروس الرمال وفي شرقك اية جمال جنوبك واسع مجال يا حلات رطبك في الشمال والغرب كردفان شقيشق قول لي يا مروح قبال صباحنا يروح يلا نمشي حدائق البان جديد ودارفور سلام زول يجيك برجل حافي بنية دارفور، الماها عادية والنيل الأزرق الثلاثة بنات لابسات تياب مبلمات واعذابي انا الليله شغلن قلبي لمن بص الرصيرص فات وعندهم عادة جدع النار في الحصاد والوازا وشرقنا الحبيب صب دمعي النار يا سواكن حار فراقك النار يا سواكن وجنوبنا الفردوس المفقود يا مسافر جوبا جوبا الخرطوم الان يقول ليك الجنوبي خلايا نائمة الجنوبين ما قادرين يفارقوا الشمال هنالك من ولد وترعرع في الشمال لا يعرف عن الجنوب حاجة نفس الايادي التي فصلت الجنوب هي نفسها التي تدعوا الى ترد اهلنا الجنوبين بحجة انهم خلايا نائمة يا حليل نحن روحان حللنا بدنا منقو قول لا عاش من يفصلنا هذا هو منهجنا منهج القومية ما قدرنا نوظف التباين الا في العنصرية الدينية والجغرافية والعرقية والقبلية عندنا كوكتيل دسم لو وظف صاح نسود العالم ولكن هيهات ثم ضاع الأمس مني وانطوت في القلب حسرة الله يصلح حال بلدنا ونستفيد من الدروس ونكون دعات سلام وهو الفطرة السليمة التي تتسق مع المنطق والوجدان السليم والإنسانية اقعدوا عافيه وكان حيين نتقابل فوق شجرة الحرية ام همبريبا طالق والفي القدر بجيبو المغراف ودمتم في رعاية الله وحفظه
