يوميات سياسي محترف
أحمد يوسف التاي
(زنكلوني شخصية نمطية رمزية تجسد شخصيات بعض السياسيين السودانيين في كل الإحزاب ، سلوكهم وممارساتهم واقوالهم وافعالهم وهي أشبه بالقبعة من وجدها على مقاسه لبسها).
السيد زنكلوني لصديقه: “أسمع نصيحتي حتى لاتعيش فقير طول عمرك”
قال السيد زنكلوني ناصحاً صديقه الذي تولى منصباً مرموقاً في الدولة:
(في منصبك دا خليك مِفتِّح ومتحرّك شديد أصلو ما تنوم ساي على الحوافز والبدلات والمخصصات بتاعت المنصب الحكومي دا، كدي حتعيش فقير طول عمرك، لازم تعمل مبادرات لصالح ورقك زي تقوم كدى تعمل ليك مؤتمرات وسمنارات وورش عمل، قول مثلا ورشة لـ (تطوير الأداء) مثلاً، وأصلاً الأداء ما بتطور لكن زي نظام جدعة كدى بتاعة مصاريف (بند ماكلة)، وتقوم تستقطب الدعم من الحكومة والمنظمات، وتقوم الميزانية البتجمعا تلبع تلاتة أرباعها، وتقوم تلم ليك شوية منظراتية جيبهم يتكلمو وكلو واحد اجدع ليهو كدى حاجة عطية مزين، وديل حيملو ليك الدواليب والأدراج كلها ورق، وإنتا من تقبض ميزانيتك تاني ما تشتغل بي كلامهم الفارغ دا بلا توصيات بلا بطيخ، وأصلاً في البلد دي ما في زول شغّال ليهو بي توصيات، أنا لمن سبتا الوزارة خليت ليهم كم مخزن مليان توصيات، لي سي قاعدة..
انت بس اعمل بي نصيحتي دي خليك ظاهر اعلاميا، في كل جريدة خلي الناس تشوف صورتك، وفيك تلفزيون..وكان مات اي زول امش معاهم المقابر، خلي ظهورك كتير…والْبع والْبع، اصلو مابخلوك تقعد كتير..ديل ياخ بجيبو الزول قبال يتوهط كويس بشيلو..والله الشالك منو زاتو ماتعرفو..جنس حسادة ياخ…
