يوميات سياسي محترف // احمد يوسف التاي
(زنكلوني شخصية نمطية رمزية تجسد شخصيات بعض السياسيين السودانيين في كل الإحزاب ، سلوكهم وممارساتهم واقوالهم وافعالهم وهي أشبه بالقبعة من وجدها على مقاسه لبسها).
السيد زنكلوني يتحدث في ندوة “شفافية ضد المحسوبية”
ربت السيد زنكلوني على كتف احد مرؤوسية موجها إياه: أسمع عندي قريبي بعدين بجيكم في المكتب ما تقصرو معاهو عينوهو في الوظيفة القلتها ليك ديك واعملو ليهو مخصصات كويسة، والعربية التوسان اعملو ليها صيانة كدى خفيفة وسلموها ليهو…عليك الله يا عمر الكلام نفذو بكل شفافية وسلام وعدالة، وشوف جوازو كان ما مجدد جددوهو ليهو عشان عايزنو يحضر معانا مؤتمر “تنمية الديمقراطية” في (بكين) الشهر الجايي.. وماتنسى تحجزو ليهو وجهزو ليهو تذكرتو وكدى……
(بعد كم يوم من التعيين) شوهد السيد زنكلوني في ورشة بعنوان: (شفافية ضد المحسوبية).. وفي تلك الأثناء طلب السيد زنكلوني من المنص إعطائه فرصة للحديث اثناء المناقشات العامة جاء ت مداخلته على النحو التالي : نحنا يا جماعة لازم نبقى شفّافين زي كيس النايلون، وزي موية الصحة ، عشان بلدنا تمشي لي قدام..تاني يا أخوانا ما عايزين لعب وماعايزين مجاملة وما عايزين محسوبية ..
خلاس زمن المجاملات انتهى عايزين الشفافية دي تكون حاضرة في كل شيء زي صحن الصلتة في الصينية ، وزي ماقالو المتحدثين اللي سبقوني نحنا لازم نضع ضوابط صارمة جدا جدا لمكافحة المحسوبية ، عشان ما يجينا اي زول تاني يقول لينا عينو لي قريبي ولا قريبتي الناس تتنافس بمؤهلاتا بس..الكفاءة دي اهم حاجة لابد ان نبسط العدل الشفافية اي حاجة بدون شفافية ما بتنفع..والله صحي..
