بقلم/صبري محمد علي (العيكورة)
وقرشي هذا هو (البروف) قرشي محمد علي رئيس الجامعة الوطنية ومن أكابر أباطرة الجامعات الخاصة في تاريخ السودان الحديث ولربما العالم العربي والافريقي لم يتفوق عليه الإ (البروف) الأسطى مامون حُميدة وما أكثر القصص والمآسي التى القت بالكثير من الطلبة والطالبات خارج قاعات الدرس لعجز الأُسر أمام جشع ونهب مصلّح
(بي فهم) من أمثال هؤلاء وصدق من قال …..
العلم أكبر نعمة
لكنه قد يستحيل لنغمة وبلاء
والعلم إن ضل السبيل فإنه
شرٌ على الدنيا من الجهلاء
*فإما أن تدفع وإما الباب يفوِّت جمل*
والقصة الجديدة بعد قصة شهادات مامون حميدة التي بلغت (٦٠٠) دولار للشهادة الواحده في حجم ال (A/4)
هي بدعة جامعة البروف قرشي التي سمّاها (بالوطنية)!!
بخصوص مُناقشة بحث التخرج لطلاب الهندسة !
و(الكلام ما جابو ليّ)
بنتي خريجة معمار الوطنية وبعيد الإفطار بالأمس تقول …
إيدك على (٤٠٠) دولار يا بابا
في شنو يابتي ! مش خلاص إنتهينا من مسلسل (رأفت الهجان) بتاع قرشي ده ؟
لا يا أبوي دي رسوم مناقشة مشروع التخرج وسيكون (أونلاين) !
طيب (يا بِتِّي) ….
و(كتين) أونلاين لزوم القروش الكتيرة دي شنو !
طيب يا (باشمهندسة) المناقشة دي مدتها كم ساعة؟
قالت محددة ب (١٠) دقائق لكل طالب يتحدث عن مشروعة و تتم مناقشته
(سمِح) …..!
يعني كل الحسبة على بعضيها نقول (٦٠) دقيقة مثلاً؟ مع كل طالب
قالت مُستحيل يا أبوي أقل من ذلك بكثير!
وعشان قرشي ما يزعل ويكمِّل قراءة المقال بمزاج (أنا دفعت يا قرشي) مُضطرّاً إطمئن
طيب يا (بروف) تعال نحسبها معاك أمسك لي وأقطع ليك وإنت زول جزيرة وأنا زول جزيرة
مُش الطالب هو من يتحمل ثمن الإنترنت في بطن بيتو؟
نعم يا أستاذ صبري
كلام جميل يا (بروف)
طيب أكيد يا (بروف) عندك مناقشين من الجامعه و آخرين (إكستيرنال) سيتجمّوا في مركز القاهرة مثلاً لهذه المهمة
أيوة يا أستاذ ..
وأكيد يا (بروف) عاوزين حقهم و (حا) (ترقعهم)
و المركز برضو عاوز أتعاب (القعدة) التي قطعاً لن تزيد تجهيزاتها عن جهاز حاسوب و(طربيزة) وكرسيين تلاته ولربما (كباية شاي) و عبر تطبيق (الزووم) تتم المناقشة في حاجة تانية يا (بروف) ؟
لا مافي حاجة يا عم صبري
طيِّب دعني أوزع معاك الأربعماذة دولار دي بالعقُل وبما يرضي ربنا يا قرشي
(قوووول تب) ….
المركز أخذ عن كل طالب (٥٠) دولار وإن كان ده رقم كبير جداً
و الدكاترة المُناقشين واللذين حتماً لن يكونوا أكثر من ثلاثة (بروفّات)
ياخ أديهُم (١٥٠) دولار
*ياخ معقول ترقُد ليك إنتا برااك ب (٢٠٠) درلار يا قرشي ياخ*
من الطالب الواحد
مُقابل (عشرة دقائق) كلام !
يا جماعة إنتو ناسيين الموت والقبر!
إنتو يا أساتذة يا أجلاء نسيتو
(اللهم من شق على أمتي فأشقق عليه) !
وهذا إعلان مجاني وأنا مسؤول عنه و أوجهه لكل أولياء الأمور والطلاب الجُدُد
عليكم
*بجامعة الرازي* بحي الأزهري جنوبي الخرطوم
و *كُلِّية نبتة* بحي كافوري
فقد تصدرتا صدر المحافل وشرف الوطنية والتعفف و إجتناب التكسب المشبوه خلال هذه الأزمة تقديراً ومعالجة وتوفيقاً لأوضاع طلابهما وتقديراً لحال أسرهم
ولدينا في ذلك سِجِّل ناصع سنفتحه مع إعلان نتائج الشهادة السودانية القادمة بإذن الله
فالتحية بقدر ما يتسع الوفاء وحب الوطن للأستاذين الجليلين
(البروف) الرزين
إبراهيم غندور
رئيس جامعة الرازي
و(للبروف) الفخيم
الزبير بشير طه
مدير كلية نبتة
شكر الله صنيعكما فقد رصدنا و وثّقنا لكما من وراء حِجاب وأنتم لا تعلمون
*الدنيا لِسّه بخير يا ولاد*
الخميس ٢٧/مارس/٢٠٢٥م
