(بعيداً عن السياسة) …الى (أبجيقه) في يوم عيده

(بعيداً عن السياسة)

*الى (أبجيقه) في يوم عيده*

بقلم/صبري محمد علي (العيكورة)

كل عام و إنت وشفعك والهانم بالف خير والسودان شامخاً عزيزاً

الذي أود أن أذكر به (أخواننا) أبجيقات في هذا اليوم العظيم يوم النحر

أن هذا الخروف الذي أتيت به تقرباً الى الله عز وجل ونحرته على سنة نبينا صلى الله عليه وسلم

*هو في النهاية (وزن) !*
وقبل ما تجي (تاني يوم) و تسأل المسكينة أم العيال السؤال المُعتاد و(البايخ)
*الخروف ده مشى وين*؟

تعال نحسبها معاك بالورقة والقلم يا (عُصار المفازة)
(فااا) ما تنسى ….
يوم العيد وإنت و شُفّعك تتناوشوا في تجهيز لحمة (الشيَّة) وكلكم عاملين فيها بتاعين (أنوتومي) و السلب الغير مُقنن الذي مارستموه مع (الفخّده) الورانية و الستارة السمينة والكتف والضُلع وإنت (متفرجخ) عامل فيها ولا بروفيسور تشريح

ده غير حته (الضنب) وإنت بتقطع فيها و (تتمطق) و أتذكْر إيد الخروف الخليتها زي الكُنش المعُوّج
(قال جزار قال)

أتذكر يا (أبو الزُمُل) لما قلت للولد هاك
(يا وائل) لحِّق أُمك لحمة الشيّة دي عشان تجهزها لينا مع المرارة!

تعرف يا أبجيقة ….
الحكاية دي (بالمييت) كده عملت ليها (٥) كيلو

وما تنسى و إنت (بتكسِّر) في اللحم …..
(المضايرا) الغير مدروسة التى مارستها في إختيار لحم الصاح والسلات ده كمان كوم تاني لا يقل عن (٤) كيلو

ما تنسى و إنت في غيبوبة اليوم داك لما قُلت للمدام بعد قيامكم مظفرين من معركة الفطور إنت و أشبال النهضة بتاعنك و إستعملتوا فيها كافة أنواع الأسلحة والمُشهيات
إتذكّر لمْن قُلت ليها و إنت تحت المروحة بالعراقي الخفيييف تنخِْس في سنونك

بالله يا سامية الغداء خليهو (أم رقيقة خفيييفة) مع صحن لحمة وساطة مع باقي شطة الفطور ! على بال ما آخد لي (غمدة)

و ما تنسى يا أبجيقة لما خالتك (بت عثمان) جات تبارك ليكم العيد وحلفت عليها (إلا) تضوق خروفك (الوتيش) وهاك يا سرويس السلات المطاول (أربعة شنكل) مع البصل والشطة و الشربوت والضحك والونسة! دي حاجة وإتنين كيلو

طيب …..
يا (عشا البايتات) عارف في اليوم الأول بس إنتو (سايفتو كم كيلو)؟
والخروف أصلاً كان كم كيلو !!

عشان كده (يا أبزرد) يا أخوي قبل ما تعمل لي بت الناس المعاك نفسيات بالأسئلة (الما ياها)

من الأفضل توزن خروفك وتمسك ليك ورقة وقلم

مع ضرورة الإستعانة بميزان إلكتروني بدلاً من الإستعانة بالبصل الأبيض والشطة والليمون .

على كل حال …..
كل عام وإنتم بخير
وزي ما بقولو أولادنا الأيامات دي
الجمال شعر
والفول زيت
كمان يا أبجيفة
الخروف وزن ياخ

*كل عام وأنتم بخير*