مالي ما بعرف البرهان..
ولا دايرين مال كتير ينسينا الله ولا دايرين نكون فقرانين شديد نكفر بالله
عشان كدى عايزة ابقى مديرة مدرسة
اجرت الدردشة / تسابيح احمد
“مي” طفلة ذات عشر سنوات حباها الله بقدر من الحكمة، والجمال والذكاء ورجاحة العقل، متقدمة على عمرها بسنين.. بليغة، رزيينة تلقائية بريئة سريعة البديهة خجولة..
نفرد هذه المساحة للطفلة “مي بابكر” لنقرأ معا ما يجول في وذهنها من افكار فإلى تفاصيل هذه الدردشة التي أجرتها معها “5Ws-service” :
# إزيك يا مي
– أهلا وسهلا
# أنا عايزة احاورك ، مستعدة؟
– نعم مستعدة، وحا اتكلم معاك بالمنطق
# بتقري في سنة كم؟
– في رابع ابتدائي
# قالوا عنك إنتي زولة حكيمة، وكلامك كلو حِكَم ومنطق رغم صغر سنك..اتعلمتي الكلام دا من وين؟
– العلم من الله، الله هو العلمني كدى
# قصدي قاعدة تسمعي من الناس الكبار، أو اتعلمتي من أمك أو ابوك؟
– الله أحنَّ من الوالدين، لو ما علمك الله ما بتتعلمي، حتى كان اهلك عملو ليك شنو داك .
# انتي انسانة موحدة ، وماسكة في الله بس..
– مافي حاجة غير الله يمسكو فيها زاتو، لو رايد ليك حاجة بتجيك، لو ما أراد ما بتجيك.
# الإنسان مسير ولا مخير؟
– الناس مخيرين، في السمح وفي الشين، البختار السمح بلقاهو، والبختار الشين بلقاهو.
# في ناس في كلامهم العادي بقولوا “مخير الله” و” الله مخير”، رايك في الكلام دا شنو؟
– الله ما مخير..!! منو البخيرو الله؟!! الله هو البختار، والناس هم المخيرين.
×عايشين كيف في حلتكم مرتاحين؟
-الحمد لله..
×لكن وضعكم تعبان وعندكم مشكلة في الموية والكهربة؟
-كدى كويسين ولا دايرين مال كتير ينسينا الله ولا دايرين نكون فقرانين شديد نكفر بالله
× رايك شنو في الدعامة؟
– قبلهم وقبالهم..طرينا الشر لي بُعدو
# بتعرفي البرهان؟
– مالي مابعرفو.. في زول ما بعرف البرهان
# أخير هو ولا عمر البشير؟
– الإتنين كويسين.
# ليه قلتي الاتنين كويسين؟
– البرهان هسي بحارب في الدعامة.
# عشان كدى بس؟
– آي عشان كدى ، وكان ماهو ، كان البحصل شنو ما بنعرفو.
#والبشير؟
البشير كان خاتي الدعامة بعيد في الخلا، ولا بخليهم ادخلو البيوت.
#وحمدوك، رايك فيهو شنو؟
حمدوك شنو عليك الله.. انسى؟
# عايز تبقي شنو بعد تتخرجي من الجامعة؟
– خليني بعد ادخلها إمكن ما اصل مرحلة الجامعة زاتو (تضحك)..
#لو دخلتي عايزة تبقي شنو؟
– مديرة مدرسة ..
# ليه مديرة مدرسة.
– عشان اهتم بالمدرسة والفصول ، والمعلمين والطلبة.
# ليه ما عايزة تكوني طبيبة أو مهندسة، أو حاجة تانية غير مديرة مدرسة.
# ليه ما عايزة طبية ولامهندسة؟
– دي رغبتي كدى ..!!.
# شكرا ليك يا مي
– شكرا ليك انتي ربنا يحفظكم والديكم ألفي نيتكم ويحفظ السودان
