غباء مع مرتبة الشرف الأولى

بقلم/صبري محمد علي (العيكورة)

سبق أن كتبتُ في غير ما مقال أن إعداد وإطلاق الشائعة عمل يحتاج لبراعة وخبرة عالية و ذكّرتُ في غير ما مرة أن الموضوع ما (فوضى ساكت)
و هُناك أُسُس وموجهات يجب إتباعها ولربما بذلت يومها نصائح مجانية (لأخواننا) القحاطة حتى لا يصبحوا (مضحكة) للشارع العام كما هو الحال الآن
يعني بإختصار ….
الحكاية تحتاج وزنه وعِدّة شُغُل
وإلا فستكون إشاعة (أي كلام)

*قُول ليّ (إنتا) عاوز تقول شنو يا أستاذ؟*

شوف يا أسطى ….
لمّا تنتظر زيارة الفريق البرهان للسعودية و(طوااالي) تعمل ليك مؤتمر في (نيروبي) للإيحاء بأن هناك أجسام أخرى على إستعداد لملء الفراغ و ترسل رسالة مفادها
(إنتا ما براك يالبرهان)
فهذا يدل على أنك أغبى خلق الله على أرض الله
لانو بإختصار يا (فالح)

(لِسّه) مسيرات الإصطفاف الوطني الهادرة تأييداً للجيش (كراسيها ما لمّوها) !!

ولما تقُول …..
إنو الزيارة تناولت عودة حمدوك وتردح كتييير في الحتة دي!
فهذا يعني أنك زول (ما عندك مُخ)
(لأنو) بإختصار يا شاطر هناك بيان سيصدر من الدولتين لتوضيح ما تم تداوله وكان عليك أن تلزم الصبر عشان تشوف ليك طريقة (مخارجا)أو فرصة لسمكرة الخبر

وهذا ما حدث لم يُذكر أياً من البيانين عودة (قشروك) بتاعكم ده !

لمّا …..
تقوم تفبرك ليك خبر طوييييل عقب إنسحاب الجيش عن (هجليج) عن إتفاق قد تم بين (حكومة بورتسودان) و(المليشيا) حول إقتسام عائدات النفط

وتقوم تزيِّن الخبر بعبارة (وأفاد خبراء في مجال النفط بكذا وكذا في سبيل (نفخ) الخبر

فكان أولى عليك ….
أن تعرف كم إنتاج هو الحقل من (أساسو) عشان الأرقام ما تطلع أكبر من الواقع و تعرف سعر البرميل كم ونصيب الشركة وزيت التكلفة الخاص بالخدمة المجتمعية
وبعدين (تنجُر الكضبة)

ده حتى لو …..
عفيناكم من عدم نشر الصور لحظة التوقيع وكده
(لأسباب أمنية مثلاً)

إذاً ….
كُلّ الدوشة الإسفيرية التي سادت اليومين الماضيين كان هدفها واحد وهو …..
تضليل الرأي العالم الخارجي بأن هُناك طريق (تالت) جاهز غير البرهان والبلابسة (بتاعنو)
و يا (أهل المحبة أدونا حبّة)

حبايبنا القحاطة …..
بكل مللكم الوضيعة يسارها و يمينها
ما قُلنا حاجة ياخ
كضِّبوا
زوِّروا
إسترزقُوا
مثِّلُوا
أعملوا أي حاجة
*بس ياخ أقروا ليها*
الحكاية دي ما فوضى ساكت
عاوزه ليها قرايه وفهم
فضحتونا ياخ
حتى في (الكضب) زيرو ياخ؟