كُلّنا مِدوِّرنا عمّك

بقلم/صبري محمد علي (العيكورة)

يبدو أنه ما زالت أمامنا ثلاثة شهور قادمة حتى تكتمل حكومة كامل إدريس بإعتبار أن ما تم الإعلان عنهم حتى الآن هم عشرة وزراء والمتبقى (١٦) وبما أن (عمنا) كامل ما زال (سايقنا بي)
(نمرة إتنين) فهذا يعني أن كل شهر نتوقع الإعلان عن (٥) وزراء !

على كل حال (دفعة) البارحة كانت جيدة قياساً بسابقتها فلم تتعرض لذات النيران التي صاحبت الإعلان عن إسم وزير الصحة الدكتور المعز عمر بخيت مما يُوحي بأن (أخونا) كامل قد إستوعب الدرس و وعي أن الحكاية
(مُش على كيفو)
بدليل الرضى العام الذي صاحب إختيار البارحة
جبريل للمالية
عبد الله درف للعدل
محاسن علي يعقوب للصناعة
بشير هارون عبد الكريم للشؤون الدينية والأوقاف
محمد كرتكيلا صالح للحكم الإتحادي

بنظرة عابرة حسب رأينا
السيد جبريل كويس لكن (حقو يشوف ليهو) وكيل (كوز) عشان الحكاية تظبط معاه

السيد عبد الله درف خاض معارك قانونية طاحنة ضد عهد القحاطة البائد ولجنة إزالة التمكين وسيُحارب منهم وقطعاً يحتاج لقوة ضاربة داخل الوزارة
(فاااا) …..
(أنا ما بفسِّر وعبد الله ما بِقصِّر)

عودة محمد صالح وزيراً للحكم المحلي تعني ضمنياً بقاء الولاة في مواقعهم
(والكلام طبعا ده ما جايي) ويلزم ضخ دماء جديدة في شرايين الولايات

الأستاذة محاسن علي يعقوب (بت الوزارة) لأكثر من ثلاثين عاماً وينتظرها عبء ثقيل أوله مصانع السكر وأعتقد ستنجح وعليها إعادة الناجحين وأن لا تجامل في ذلك مهما كلّفها

وكفانا يا أستاذة
صورة إبراهيم الشيخ (بالشعر المفلفل) والفل ست وهو يتجول داخل حطام مصانع السكر كأدق تعبير لفشل (القحاطة)

السيد بشير هارون للأوقاف والشؤون الدينية و(قيل) أنه ضمن إحدي حركات سلام (جوبا)
(ويبدو إنو زول ما طمّاع) زي التانيين
ياها مساجدنا وكنائسنا وشوية أوقاف و(أصصصعب) حاجة ملف الحج و العمرة
(وده مقدور عليهو)

نتمنى كامل التوفيق للوزراء الجدد

*ويظل سؤالنا الراتب ياكامل هو*
لماذا تتهيبون إعلان برنامج حكومتكم و مدتها والإنتخابات !

آآي أنا معاك ومقدر جداً الكلام ما عندك
لكن ياخ الإعلان عن البرنامج مهم جداً عشان (كمان ياخ)
نعرف (اللّينا والعلينا) ونحاسبكم واللّا شنو يا جماعة

وإطمئن يا سيد
فسنضع نسبة مئوية (لغتاتة) عمك في الموضوع ده

لكن لازم نسمع توجيهكم بخصوص الإنتخابات كما لم تبخلوا بتوجيه كل صاحب طبلية سيجائر داخل بورتسودان
(فااا)
حقو ما تشغلونا بالوزير فلان وعلِّان و نحن ندفُر معاكم في عربية بلا أنوار

ياخ …..
عمّك ده غتيت غتاته مِدوِّر ليك الشغلة دي كُلّها و يتاوق بالحيطة من بعيييد