( يا عبدو عيب …الدنيا حر والموية بتسخن عليك )

بقلم/ العليش الطريفي محمد

! حكومة الامل والتى طال أملنا وانتظارنا لها ، لم تعد كما كنا نتوقع ،اخذت زمنا طويلا فى تعيين الوزراء (كفاءات قال ) وما زلنا ننتظر الا ان السيد رئيس مجلس الوزراء السيد كامل ادريس لم يكمل (تمومة الجرتق) حتى يكتمل فرح السودان ، لا نريد الحديث عن الكفاءات ، ولا عن الثروات التى يمتلكها السودان ، زى ما قال صبري (كلها عارفنها ) كمل الكفاءات وشكل (الحيكومة)وادينا برنامجك ماذا تريد أن تفعل للسودان ، الزمن (روح) زى ما بقولوا اهلنا المزارعين وقت الزراعة والكديب فتات ، عارف ونحن عارفين الزمن عنده تكلفة ما ( ختيتها ) فى حسابك ولا شنو؟ والحرب مدورة والناس تعبانه (نزوح ، لجوء ومعسكرات نزوح )وناس ما لاقيه حق الفطور ، جامعات مغلقة ، وواحدات شغالة، هل يستوى الذين يعلمون والذين لا يعلمون…؟ وهناك المثل بقول (اسمع كلام الببكيك ما تسمع كلام البضحكك ) فيا سعادة رئيس مجلس الوزراء السيد كامل إدريس اسمع كلام اخونا صبرى لان الصبر قل والناس ( مهمومه وغلبانه ) ناس بتشحد وناس بالدين ، ورينا البرنامج الاقتصادى عملت فيه شنو. ……؟ وزى ما قال ود التاي هذا قسمى فيما املك …… (دحين شد حيلك وانكرب ) الدنيا حر والموية بتسخن عليك .