بقلم/صبري محمد علي (العيكورة)
والكلام ما (جابوه ليّ) والحصل في بطُن بيتي..
كلّفت اليوم وبتفويض رسمي حسب ما أُعلن عبر (قروبات) الجامعة مشكورة بخصوص إستخراج وتوثيق شهادات خريجي كلية الطب وإعلان (التسعيرة) ….
بكلاريوس ، تفاصيل ، إفادة
(مش عارف)
خالي توثيق أو مع التوثيق
الإجمالي كده
سدد على رقم بنكك الفلاني
سدد سدد
سددنا يا مؤمن
حقيقة ما قصروا تقريباً إسبوعين أو أقل أعلن المسؤول و عبر (القروب الطلبة) عن إكمال إستخراج وتوثيق الشهادات حسب طلب الطالب أو الطالبة
وأعلن المسؤول (الله يطول عمرو) عن صيغة للتوكيل لمن هم خارج السودان لإستلام الشهادات
(العبد لله) أوكلتُ وأنا بكامل قواي العقلية صديقي العزيز معاوية محمد أحمد صديق من أبناء بورتسودان لإكمال مهمة إستلام شهادتي بنتي الدكتورة (رقية)
أحدهما شهادة بكلاريوس وهذه وللأمانة والتاريخ وجدناها صحيحة (مية المية) وتأكد لنا أيضاً صحة كتابة الإسم بالإنجليزي ودي النقطة المهمة عندي لانها (مُمكن) تطلع ليك بالحلفاوي أو الشايقي أو النوباوي أو الجعلي حسب من يُباشر عملية إفراغ البيانات وكتابة الأسماء فكنت حذراً لمطابقة الإسم باللغة الإنجليزية لما هو مكتوب بجواز السفر .
أما شهادة التفاصيل !!
فإليكم التفاصيل
طلعت (لينا) تفاصيل سنتين بس
سنة أولى وسنة تانية فقط !
طيييب ….
يا جماعة (أنحنا) ما قرينا خمسة سنوات !
ودفعنا خمسة (رُسومات) الحكاية دي مشت وين؟
قناعتي أنه ….
خطأ بشري وجل من لا يخطئ
وسيتم تصحيحة بلا شك
و لكن الذي أرجوه من أولادنا وبناتنا الذين أوكلت لهم هذه المهمة أن *يركِّزوا شوية مع الطباعة والحواسيب*
معقول ياخ
(تلااااته) سنة
يوم ورا يوم
بي صبر شديد منتظرك أنا
على قول المبدع بلال موسى
(تروح ساكت)؟
ياخي قول سمستر
مبلوعة
لكن (٣٦) شهر يا جماعة معقولة !
غايتو …..
بالطريقة دي يوم بتجلطوا ليكم زول يا أولادي !!
*يا جومين لكن ما بالغت ياخ*
وحكمة الله يا جماعة
شهادة بكلاريوس الهندسة يكتبوا ليك تخرج بدرجة كذا (جيد ممتاز جيد جدا)
أما شهادة بكلاريوس الطب (بدوك ليها سليقة ساكت) إنك تخرجت وخلاص تمشي تكوس للتقدير في شهادة التفاصيل !!! مع إنها جامعة واحدة
(قااادر الله)!.
